Na madrugada da passada sexta-feira, 11 de outubro —Dia da Galiza Combatente—, a cristaleira da sede de La Voz de Galicia em Vigo —situada na rua de García Barbón—, foi atacada com pedras ou objetos contundentes.

A açom, porém, foi totalmente silenciada polos meios de comunicaçom. A sabotagem só transcendeu graças a um tweet do delegado do Governo espanhol na Galiza, Javier Losada, no que transmitia a sua «solidariedade» perante o «ato de violência ocorrido nesta madrugada» no citado local. O Galiza Livre confirmou os danos e a sua origem.

Este ataque é mais um exemplo do aumento da violência política de «baixa intensidade» na Galiza neste ano.

5 ataques a sedes de partidos espanholistas em 6 meses

Assim, só nos últimos seis meses, fôrom atacadas, com pedras ou objetos contundentes, cinco sedes de partidos espanholistas na Galiza.

Destarte, no 27 de abril —véspera dumhas eleiçons espanholas—, pessoas desconhecidas rachárom os cristais da sede de Ciudadanos na Galiza (situada em Compostela) e do PSOE em Ponte Vedra. No primeiro caso, aparecêrom pintadas coas legendas «Fascistas fora da Galiza» e «Independência», e, no segundo, «Traidores da classe operária».

24 horas depois, o objetivo foi a sede de Vox em Verim.

No 22 de maio —quatro dias antes dumhas eleiçons municipais e europeias—, foi atacada a sede do PP em Ames. Nesta ocasiom houvo, de novo, pintadas: «Independência» e umha bandeira da pátria.

Por último, no 7 de outubro —quatro dias antes do Dia da Galiza Combatente—, foi escachada, por segunda vez, a cristaleira da sede de Ciudadanos na Galiza.

12 ataques a caixeiros automáticos em Compostela em 4 meses

No 28 de abril, a Polícia espanhola detivo em Compostela a dous militantes independentistas galegos, aos que acusou de ter participado em doze açons na capital galega, principalmente ataques a caixeiros automáticos com objetos contundentes.

No seu momento, as forças de ocupaçom espanholas valorárom os danos em mais de 30.000 euros.