No próximo 18 de Outubro está agendado em Compostela um foro da plataforma ultraconservadora europeia ‘One of Us’. Em rolda de imprensa a entidade declarou que ter escolhido a cidade galega por ser ‘parte das raízes de Europa’. ‘One of Us’ tem planejado estabelecer um observatório da família na capital galega de forma permanente. Desvelamos quem está por trás da iniciativa a nível galego. Além do catolicismoe dumha alegada ‘volta às essências’, o negócio joga o seu papel.

One of Us: a uniom de todas as plataformas ultras no ámbito europeu

A plataforma nasceu o passado Fevereiro em Paris e esta chefiada por Jaime Mayor Oreja. Por palavras do conhecido ex-ministro aznarista, na linha de toda a extrema direita continental, há umha crise da ‘verdade’ na Europa e cumpre que lutar porque o velho continente tiver “mais alma e espiritualidade”. Aglutina todas as organizaçons pró-familia e antiabortistas da Europa e um dos seus referentes académicos e intelectuais é Rémi Brague, professor emérito de filosofia religiosa da Sorbonne. Para além da questom da família e o aborto, todos eles tenhem-se destacado por opôr-se publicamente a retirar a alimentaçom de Vicent Lambert, um cidadao francês em estado vegetativo desde o ano 2008.

A princípios desta semana Compostela Aberta pediu explicaçons à alcaldia de Compostela por receber oficialmente as delegaçons participantes do evento. Assi figura no programa do congresso que começa os dous dias agendados com misa na capela da Praça do Obradoiro. A alcaldia deveria dar explicaçons, mas nom vai ser a única instituiçom envolvida com corporaçons ultras.

Jaime Mayor Oreja, o ex-ministro que nunca condenou o franquismo

Umha máxima que repetem habitualmente desde a plataforma ultra nas suas declaraçons através de Mayor Oreja é que a crise nom é umha questom de direitas ou de esquerdas, mas umha questom ‘civilizatória’. A querência por nom contornar-se ideológicamente é umha constante nos movimentos de tipo ultra, que estám a aproveitar a consciência do colapso para ganharem adeptos. No mais superficial do seu discurso, existiria umha crise de valores que se fundamenta em um difuso caos e desorde que cumpre que solucionar de modo trasversal. Para isso chefia a grande plataforma o político espanhol.

Mayor Oreja nasceu no seio de umha família do empresariado donostiarra, tanto por parte de mae como de pai. Estudou nos marianistas da mesma cidade e foi secretário durante anos da Asociaçom Católica de Propagandistas, umha das entidades que representava o sector nacional-católico do Regime. A partir desta sociedade religiosa criárom-se múltiples instituiçons: desde a Universidade San Pablo CEU até Cáritas. O modelo de actuaçom é sempre o mesmo: estabelecem grupos de criaçom ideológica, penetram nas altas esferas do poder e criam o que poderiamos chamar instituiçons regidas pola moral católica na sua interpretaçom ultramontana. A Asociaçom Católica de Propagandistas foi a congregaçom mais influinte durante a etapa franquista, só deslocada nos últimos anos do regime polo apoio prestado aos tecnócratas do Opus Dei por parte de Franco.

Mayor Oreja pertence também à fundaçom FAES e em reiteradas ocasions negou-se a condernar o franquismo. Da guerra civil dixo que “havia dous bandos que reprimiam.

Recebeu o prémio CEU à defesa da vida e também no ano 2016 um prémio idéntico por parte de Hazte Oir. No ano 2007 em umha entrevista realizada pola Voz de Galicia negou-se reiteradamente a condenar o franquismo. Em relaçom com notícias de actualidade, podemos afirmar que Ortega Smith, vozeiro de VOX é um imitador de Mayor Oreja em versom mais radicalizada e agressiva; também o político donostiarra, apesar de projectar umha imagem de moderaçom declarou que na guerra civil “ havia dous bandos que reprimiam”. A linguagem dos vencedores tem o perigo de querer falsear a verdade que eles próprios dim querer recuperar, e também tem o perigo de penetrar na sociedade até normalizar o fascismo.

No ano 2010 qualificou o aborto como “ algo próprio dos bolcheviques”. No seu retiro ( ou mais bem misom) na Europa dirige desde esse mesmo ano o Think-Tank Red Europea de Ideas e agora One Of Us.

O homem de Jaime Mayor Oreja em Compostela: Agustín Dosil Maceira

Na rolda de apresentaçom do congresso que vai ter lugar em Compostela Mayor Oreja nom estava só. Acompanhava-o na foto de imprensa o catedrático da USC de psicologia geral Agustín Dosil. Este homem tem lecionado matérias relacionadas com a família na universidade compostelana e psicologia evolutiva, da família e da terceira idade som as suas especialidades. Também figura como professor externo na Universidade de Vigo.

Agustín Maceira e Jaime Mayor Oreja na apresentaçom pública do congresso do 18 de Outubro

Mas também é especialidade sua a carreira empresarial. Assi é como figura como vicepresidente de Serge Lucense, umha empresa que gestiona residencias da terceira idade, formaçom relacionada com esta área, etc. Para além disto aparece no patronato de umha outra empresa radicada na Corunha.

Agustín Dosil tem interesses empresariais no sector da família, através da empresa Serge Lucense, concessionária de residências de idosas. Paralelamente é reitor da universidade privada Liberquaré, de capital mexicano e galego.

O presidente de Familias Mundi, umha outra organizaçom pró-familia, aparece como reitor da Universidade Liberquaré, umha instituiçom educativa privada um tanto chamativa que tem assinado vários convénios com o colégio LaSalle de Compostela e também com a própria USC ou a Universidade de Vigo. Em concreto, em aliança com ela ministram-se vários mestrado e cursos de pos-grau próprios da USC onde se presume a docência e colaboraçom de Dosil: ‘Experto em ciências da família’ é a disciplina fundamental que se lecciona.

Agustín Dosil assinando um convénio de qualidade universitária com organismo dependente da Junta

O chamativo da instituiçom, privada e com umha focagem educativa de corte mui liberal e competitivo, é o seu capital. No seu conselho social está SOGAL Educación, chefiado por umha mulher chamada Xochtil Lagarda, mexicana presidenta de COPAX e da mesma Familias Mundi da delegaçom em México. COPAX é o sindicato da patronal mexicana, que aglutina empresas de diferentes ramos. As empresas que se situam na sua órbita venhem a representar o 38% do PIB mexicano, polo que se pode dizer que controlam boa parte da economia do país latinoamericano.

Imagem da presidenta do grupo promotor da Universidade Liberquae e também presidenta de COPAX em México

O ideólogo na Espanha do lóbbi ultra: advogado do estado, empresário e filósofo em tempos livres

Um outro exemplo especialmente relevante é o de Jesús Trillo-Figueroa Martínez-Conde. Nom só é o irmao do ex-ministro de defesa Federico Trillo. Trata-se de um homem institucional e de projecçom empresarial. A advogacia do estado compagina-a com o seu próprio buffete de advogados em parceria com outros companheiros do ramo. Iuris Family Office dedica-se à mediaçom processal em casos relacionados com a construcçom, o sector da energia, infraestruturas e serviços. Tem vários sócios que, por sua vez, estám relacionados ou som co-sócios em várias empresas de construçom. Ele próprio é conselheiro delegado da empresa Global Music Sport, que se dedica à realizaçom de eventos desportivos e é concessionária, segundo se recolhe em infoempresa, de instalaçons desportivas. Família e desporto, duas constantes que se tocam mais umha vez, pois Jesús Trillo trabalha com a sua própia filha no gabinete de advogados. Eloísa Trillo fai parte também da directiva da Fundación Deporte y Desarrollo, umha ONG que promove valores através do desporto principalmente em países do que eles denominam eufemísticamente “ en vías de desarrollo”.

Desporto e moral cristá integrista som dous dos eixos de intervençom das corporaçons ultra. Também o mal chamado “cooperación para el desarrollo” que nom deixa de ser falsa caridade cristá por parte de classes privilegiadas e dirigentes.

Para além da sua actividade empresarial a militância política é um aspecto importante. Fijo parte do secretariado da Fundación Cánovas del Castillo. Entre os eixos ideológicos de dita fundaçom encontram-se os seguintes: cristiandade, amor a Espanha, liberdade e anti-comunismo. Todos os caminhos parecem conduzir às FAES, e é assi como exerceu de patrono da citada fundaçom até o ano 2004.

Jesús Trillo tem-se destacado por títulos como ‘La ideología de género’.

A editorial Libros Libres encarrega-se de editar as suas obras. La ideologia invisible, um tratado sobre o que denominam ‘nova esquerda’, é um deles. Estas ediçons partilham espaço na editorial com livros tam científicos como o que segue: Como superar da depresión según Santa Hildegarda.

Um lobbi contra as mulheres

O programa político destes lobbis nom difire na sua essência com a pretensom geral e fim último do patriarcado de meter as mulheres nas casas, só que as suas propostas e formas som exprimidas no giro mais radical e propagandista. Trillo-Figueroa declara em umha das suas palestras que tenhem pretensons “ revolucionárias”, fazendo claras alusons ao movimento falangista espanhol. Palavras e programa coincidem com a secçom feminina até em pontos e comas. Para eles o mundo está em caos, a ideologia de género tem impregnado a sociedade e a revoluçom necessária da que falam é umha volta à orde, à espiritualidade e a umha sociedade heteropatriarcal. Constantemente estám a falsear a realidade, pois em nengum momento eles próprios se situam em parámetros antisistémicos mais que na palavrada: som influintes empresários que se estám a lucrar do seu trabalho e, de passagem, de um ódio continuado contra as mulheres que dim defender. Por isso apregoam o feminismo sem mulheres. Trillo-Figueroa declara-se feminista desde um ponto de vista biologicista: há machos e fémias. Perante a crise estrutural do capitalismo proponhem a saída mais reaccionária e perigosa contra as mulheres. No ideológico e no material vivem das mulheres e do seu ódio contra as mesmas.

Luitar contra a crise de valores e restaurar umha sociedade ‘católica e espiritua’l som objectivos dos mencionados lobbies ideológicos. Declaram-se homófobos, biologicistas e anti-comunistas, mas procuram proximidade com a audiência através de um paternalismo dialéctico: eles sabem os problemas da sociedade e vam-chos desvelar.

Por outro lado, utilizam umha linguagem que se poderia denominar “mistificadora”. É própio destes grupos de extrema-direita dizer que nom tenhem ideologia, que nom se trata de questons de direitas ou de esquerdas, que é trasversal, “ que interessa ao público em geral”. Trata-se de um uso tosco de umha retórica de tipo centrista, que procura colocar-se em um ponto meio para tratar de achegar-se a um público mais amplo. Na realidade é umha mentira que mil vezes repetida acaba por calar a nível discursivo. Pola mesma, definem-se como umha plataforma cultural quando na verdade estám a fazer política (e da dura). Um dos seus embaixadores na Europa, Massimo Gandolfini, assegura que a campanha de One Of Us nom é umha iniciativa católica, mas “civilizatória”…

Homofobia, misogínia, patriarcado paternalista, catolicismo, anti-comunismo, liberalismo económico e luita por umha liberdade que é apenas a sua: a do dinheiro, a dos privilégios machistas, a dos vencedores e emprendedores. Umha direita neocon que pugna a nível mundial polo controlo das instituiçons.