Neste fim de semana inaugura-se O Quilombo, novo centro social em Ponte Vedra. O coletivo programou várias atividades para celebrar a abertura oficial do local, que terám lugar na sexta-feira 22 e no sábado 23, ambos dias desde as 18:00.

Assim, na sexta-feira realizárom a apresentaçom da Semente e atividades para crianças (19:00). Também a apresentaçom do livro Zeca Afonso para crianças (20:30) e do próprio centro social, que incluirá um colóquio coas presentes (21:30).

No sábado haverá umha palestra sobre a resistência no Brasil sob a extrema direita (com Jakson Renner, de Brasilegos contra o Golpe) (18:30) e a apresentaçom da Coordenadora Antifascista de Vigo e Ponte Vedra (19:15). As jornadas finalizarám cumha repichoca (21:30). Também haverá petiscos para cear.

O Quilombo —o nome provém dos refúgios das escravas fugidas no Brasil, desde onde se organizavam e lanzavam operaçons para libertar novas escravas— define-se como soberanista, feminista, ecologista e internacionalista; defende a cultura popular e a normalizaçom linguística; acredita na autogestom; e fomenta o consumo local e ecológico, e a saúde física e mental.

Nasceu em abril de 2018 como associaçom cultural, e desde entom já organizou várias atividades: umha homenagem à Revolução dos Cravos, um roteiro polo Lume Novo ou um obradoiro de autodefensa polo 8-M. Também levaram a Ponte Vedra a obra de teatro Negra! Ensaio sobre o auto-ódio e o documentário O Canteiro de Sebil. Aliás, entre outras declaraçons e apoios, nestes 11 meses O Quilombo foi um dos coletivos convocantes da manifestaçom unitária da mocidade independentista do 24 de julho (Compostela), apoiou as mobilizaçons feministas, antitouradas e contra Celuloses que tiveram lugar na cidade, denunciou os atos públicos de Vox e da Brilat (Exército espanhol) e apoiou as reivindicaçons da vizinhança de Viascom, contrária a umhas obras na N-541.

O anterior centro social de Ponte Vedra, a Revira, fechou em maio de 2014, após 10 anos e 5 meses de contribuiçom à construçom nacional da Galiza superando pressons policiais e ataques fascistas.