Por Jorge Paços /

Boa parte dos movimentos sociais do País toparám-se de novo arredor do desporto. Será nos vindouros dias 8 e 9 de Setembro, na Carvalheira de Parga e em Sete Moinhos de Guitiriz, numha nova cita das Olimpíadas Populares Galegas. A cita suporá a sexta ediçom desta convocatória aberta que nasceu em 2011 para fomentar o convívio entre distintas iniciativas populares da Galiza, e para fazê-lo com a defesa do exercício nom mercantilizado e em contacto com a natureza. Desta volta, a veterana associaçom chairega Xermolos responsabilizou-se pola organizaçom do evento.

As Olimpíadas Populares Galegas fixeram a sua estrea na Primavera de 2011 no Ribeiro, para irem circulando em anos seguintes polas comarcas de Compostela, Arnoia, Baixo Minho e Terra de Montes. Com parons pontuais em 2015 e 2017, estes particulares jogos olímpicos do movimento popular congregárom boa parte dos centros sociais do País, e do tecido associativo que se move à sua volta. Com umha organizaçom autogerida e completamente à margem dos poderes oficiais -semelhante à que guia o dia a dia dos próprios centros sociais- as Olimpíadas servem também para tomar um respiro no ritmo de vertigem que domina as nossas vidas, e confluir durante dous dias num espaço natural, desvinculados de ecrás e realidades virtuais, para praticar um desporto diferente: longe da obsessom polos registos, os materiais ou as imagens. Um desporto nom muito diferente do que, como jogo popular, praticou o povo galego antes de cair baixo as pautas do espectáculo.

Prova de luita galega numha das passadas citas das OPG

Variedade de provas

Os e as participantes nas OPG terám um amplo leque de provas que escolher: o desporto rei está presente, com salto de longitude, e competiçons atléticas de velocidade e fundo (100 e 5000 metros), acompanhado do triatlo; haverá desportos de equipa como balom voleia ou brilê; também provas populares como luita galega, tiro de corda, lançamento de sacho, lançamento de boina, e obviamente, bilharda. Mesmo as pessoas pouco aficionadas ao exercício físico terám a sua ocasiom de participar nos jogos com disciplinas como o jadrez ou a regueifa.

Equipas

Segundo o regulamento das OPG, um colectivo pode constituir a sua equipa com um número mínimo de cinco pessoas e deve participar alo menos de três provas. As Olimpíadas estreárom-se há sete anos com a vitória de Siareiras Galegas; na passada ediçom, celebrada em Cerdedo, o CS Faísca alçou-se com o trofeu.

Quem quiger conhecer mais detalhes do evento, pode fazê-lo nas redes sociais.