Se ontem informávamos sobre umha nova ediçom das Olimpíadas Populares Galegas, hoje fazemo-nos eco de outra iniciativa vinculada com o desporto e impulsada polo movimento popular. A associaçom cultural Xermolos de Guitiriz, os Riazor Blues e a Irmandade Manuel Maria organizam o primeiro memorial Irmaos da Lixívia em recordo aos irmaos Bebel, France, Jaurés e Pepín Garcia. Umha vez mais é o movimento associativo popular quem leva a iniciativa na recuperaçom da nossa memória e fomenta o desporto nom mercantilizado.

Memoria antifascista

Os oito irmaos eram conhecidos na cidade corunhesa como os filhos da lixívia devido a que seu pai, militante socialista e um dos fundadores da Agrupaçom Socialista, quem já fora desterrado da sua vila natal, Ribadeu, por questons políticas, tinha um pequeno negócio de fabricaçom e venda de lixívia no popular bairro de Monte Alto.

Dos oito irmaos, apenas quatro deles compartiam as inquietudes políticas do seu pai. Bebel, jogador do Depor, France, boxeador, Pepín atleta e ciclista, e Jaurés, o mais novo dos quatro, eram militantes socialistas, polo que quando se produziu o golpe fascista em Junho de 1936, organizaram-se para fazer-lhe fronte ao terror.

A própria noite do dia 19, Pepín, o mais velho, apoderou-se de varias armas com as que nos seguintes dias ofereceria resistência nas ruas da cidade contra os militares sublevados. Os outros três irmaos ajudariam na defesa do Governo Civil. Logo destes primeiros enfrentamentos, e com a cidade já controlada polo bando fascista, três deles, Bebel, France e Jaurés, forom detidos em Guitiriz quando intentavam chegar a Astúrias, e trasladados à prisom da Corunha. Bebel e France forom condenados a pena de morte e fuzilados em Punta Herminia o 29 de Julho de 1936 enquanto Jaurés, quem fora encarcerado, apareceu assassinado meses despois no cemitério de Sam Amaro.

Pepín correu melhor sorte e conseguiu fugir em um pesqueiro roubado até chegar a território republicano. Lá uniu-se ao exercito republicano e luitou nas filas do Quinto Regimento, mas umha vez que finaliza a guerra, escapa a França e posteriormente a América do Sul.

Ato de homenagem

Na apresentaçom do evento participarom um representante de cada organizaçom ademais de Selva García, filha de Pepín, único irmao que sobreviveu ao golpe fascista.

A homenagem terá lugar este domingo, 26 de agosto, e contará com as seguintes atividades:

    • Ás 11 da manhã dará começo a homenagem com um partido alevim e juvenil entre as equipas de Guitiriz e A Corunha no Campo Suso Cruz de Guitiriz.
    • Ás 12, no mesmo lugar, jogara-se o primeiro Troféu Bebel entre as equipas Guitiriz e Riazor Blues.
    • Ás 14.15 celebrara-se o ato memorial e a oferenda floral aos Irmaos da Lixivia e demais vítimas ao pé da fossa comum em Santa Marinha de Lagostelhe. Ao remate do ato haverá um jantar de irmandade entre as pessoas assistentes.
    • Ás 17 também haverá atuaçons dos grupos Bloquinho de Xermolos e Nuada.

Aproveitamos para lembrar o artigo que se publicou recentemente neste portal em memoria de um dos irmaos da lixivia, Bebel.