Futebol gaélico, trainheiras e atletismo forom as três disciplinas onde o desporto galego brilhou especialmente esta jornada de verao. Ambas as duas seleçons nacionais de futebol gaélico, a embarcaçom de Cabo de Cruz e a atleta ribeirense Ana Peleteiro forom as protagonistas de sucessos históricos para o desporto galego.
Dominadoras na Bretanha
Como anunciávamos neste mesmo portal há apenas uns dias, as seleçons galegas de futebol gaélico competiam este fim de semana no primeiro campeonato europeu de seleçons na vila bretã de An Oriant (Lorient).
O resultado da expediçom galega foi extraordinário onde a equipa feminina proclamou-se campeã de Europa enquanto a equipa masculina traze consigo a medalha de prata.
As galegas chegarom invitas à final onde se teriam que enfrentar à seleção de França para conquistar o título europeu. Umha vez na final, vencerom à equipa francesa em umha intensa e longa final que finalizou com um ajustado 28-24 a favor das galegas. Deste jeito, a seleçom galega conquista o primeiro campeonato de Europa que se celebra.
Enquanto aos rapaces, também obtiverom a classificaçom para a final do torneio europeu, mas nom conseguirom vencer à potente equipa francesa contra a perderom por um meritório 15-10.
Nova bandeira para o remo galego
Desde que em Julho do ano 2013 a tripulaçom de Tirám se adjudica-se a bandeira Concelho de Moanha, nenhuma outra equipa galega volveu vencer em umha regata da máxima categoria do remo em banco fixo. Até este domingo.
Desta volta foi a embarcaçom da ria de Arousa, Cabo da Cruz, a que conquistou a sua segunda bandeira na liga ACT. E foi no mesmo cenário, Hondarribia, onde catorze anos atrás, os cruzenses ganharam a sua primeira e única bandeira de liga.
A trainheira de Cabo da Cruz voou em aguas guipuscoanas e venceu por apenas doze centésimas de segundo sobre a embarcaçom bermeotarra de Urdaibai, quem acabou em segundo lugar e continua líder na classificaçom geral da liga.
A outra equipa galega que também compete na liga ACT, Tirám, rematou na undécima posiçom e luita por sair da última posiçom da classificação geral e evitar desse jeito descenso direto à liga galega.
Ana Peleteiro salta para conseguir a primeira medalha para Galiza
A atleta de Ribeira alcançou o terceiro posto no triplo salto no campeonato de Europa de atletismo que se celebrava em Berlim. Um prodigioso salto de 14,44 metros foi o que lhe valeu à galega para ganhar a medalha de bronze e que a situou a apenas um centímetro da prata.
Este resultado supom a primeira medalha para o atletismo galego em um campeonato europeu absoluto.