As seleçons galegas dirigem-se à Bretanha para competir no campeonato europeu

Por Zaavrel /

Este fim de semana, 11 e 12 de agosto, celebram-se os Eurogames 2018, ou o que é o mesmo, o primeiro campeonato europeu de seleçons de futebol gaélico, onde participarám as duas seleçons galegas. O torneio está integrado no programa oficial do Festival Intercéltico, evento que reúne mais de meio milhom de pessoas cada ano, e que terá lugar na vila bretã de An Oriant (Lorient).

Rápida progressom

Desde que em Julho de 2012 a seleçom galega masculina debutara em um jogo internacional, daquela contra a seleçom bretã, a situaçom deste desporto no nosso País mudou de jeito notável. Se na altura apenas havia equipas e, como é óbvio, tampouco havia ligas nem nenhuma outra competiçom regular, hoje existem umha liga feminina e outra masculina compostas por 8 e 11 equipas respeitivamente, além da Copa Galega e da Liga Gallaecia. Esta última tem a particularidade de jogar com equipas mistas, motivo polo qual nom está reconhecida pola GAA (Gaelic Athletic Association), máximo organismo do fútebol gaélico.

As duas equipas galegas que acodem ao EuroGames 2018 contam agora com experiência em competiçons internacionais e mesmo participarom de jeito oficial nos dous últimos campeonatos mundiais. No verao de 2015 disputarom os Jogos Mundiais celebrados em Abu Dhabi onde ambas equipas conseguirom subir ao pódio. Na última ediçom, celebrada no ano 2016 em Dublin, e no que já participarom 16 selecçons nacionais, as raparigas rematarom na quinta posiçom enquanto os rapazes subirom ao pódio a recolher a medalha de bronze.

Um novo desafio

Como se dize, este é o primeiro campeonato europeu e as duas equipas galegas viajam com a ilusom de trazer consigo o troféu. Os selecionadores galegos convocarom a catorze desportistas por cada equipa para defenderem as cores galegas.

Na categoria feminina a equipa está formada por moças de cinco equipas diferentes da Asociaçom Galega de Futebol Gaélico: seis jogadoras das Filhas de Breogám, quatro da Estrela Vermelha, duas de Herdeiras de Dhais enquanto o Ponte Vedra e o Auriense aportam umha jogadora cada umha.

A seleçom masculina viajará com jogadores de cinco equipas, todos eles também da Asociaçom Galega de Futebol Gaélico: seis do Estrela Vermelha, cinco de Irmandinhos, e um jogador de Herdeiros de Dhais, Filhos de Breogám e Auriense.

A seleçom feminina terá como rivais os combinados de Bretanha, Alemanha e França, enquanto os homens terám também como rivais os combinados de Bretanha, Alemanha e França além da umha debutante em competiçons internacionais, a equipa de Occitânia.

A expediçom galega partirá hoje, sexta-feira, desde A Corunha, parando em Compostela e Vigo para dirigir-se ao aeroporto de Sá Carneiro de Porto, desde onde voarám cara a Nantes.