Por Jorge Paços /
A celticidade da Galiza foi umha das grandes controvérsias que marcou a reconstruçom da nossa identidade nacional nos últimos dous séculos. Entendida como um elemento de primeira magnitude por umha parte importante do galeguismo, tivo também importantes valedores em sectores intelectuais foráneos. Um deles é que representa Francesco Benozzo, o pensador italiano que estará em Ponte Vedra na vindoura semana, de mao da Irmandade Druídica Galaica.
Benozzo é um intelectual polifacético nado em Módena há quase cincuenta anos, músico e nomeado em várias ocasions ao Prémio Nobel de literatura. O seu vencelho mais estreito com a Galiza, porém, vem do seu jorne académico na Universidade de Bologna, onde defende as teses do chamado ‘Paradigma da Continuidade Paleolítica’. Tal teoria defende a origem da cultura celta na Galiza e o norte de Portugal (a Gallaecia originária), relacionada com os primeiros construtores do megalitismo, logo extendido por toda a faixa atlántica europeia.
Benozzo tem integrado o estudo dos mitos na reconstruçom pre-histórica, entendendo-os como complemento da evidência arqueológica. Eis o sentido dos seus estudos sobre a Atlántida, que pom em relaçom com o celtismo. Para o autor italiano, as raiceiras remotas da nossa cultura remontam ao Paleolítico serôdio e ao Mesolítico, por volta de 15000 anos antes de nós. A sua concepçom do celtismo nom pom em primeiro termo a questom linguística -como fam outras correntes-, e em troca leva em conta elementos etnográficos como a cosmovisom, os ritos, as leis e costumes ou a paisagem cultural e ocupaçom do território. É desta perspectiva que a Galiza ocupa um lugar de destaque no celtismo atlántico, segundo Benozzo.
As pessoas interessadas em mergulhar no cerne da nossa identidade mais recuada podem fazê-lo na palestra que Benozzo leccionará em Ponte Vedra no vindouro sábado 30 de Junho ; decorrerá no Centro Social Gorgulhom, com o título “Os celtas atlânticos da Galiza e o mito da Atlântida: evidência científica para umha velha lenda?”. O acto complementará-se com um concerto do próprio Benozzo, conhecido também como harpista notório.
A Irmandade Druídica Galaica organiza o acto, em colaboraçom com a Associaçom de Vizinhos Eduardo Pondal, que começará às 19h00 do serao no local da Rua Curtidoira.