Por José Manuel Lopes Gomes /
Evaristo Páramos, mais conhecido como « Evaristo » desde a sua participaçom protagonista em La Polla Récords, engrossa a lista de artistas populares no ponto de mira do poder espanhol. Na mesma semana em que conhecíamos o exílio do rapeiro Valtonyc para evitar o seu ingresso em prisom, Evaristo teria sido identificado numha actuaçom, do que se desprende a existência dum procedimento judicial contra ele.
Os feitos acontecêrom durante a celebraçom do festival Primavera Trompetera, na localidade andaluza de Jerez. Logo do espalhamento de rumores confusos sobre o que realmente teria acontecido, sabemos agora que o músico foi identificado ; na identificaçom, teria-se-lhe comunicado o início da investigaçom sobre as suas letras.
Evaristo, natural do Baixo Minho e filho adoptivo do País Basco, ganhou releváncia pública polo seu papel em grupos como La Polla Records e Gatillazo. Sempre solidário com as causas populares e o ideário independentista da esquerdas, tem plasmado os seus pensamentos na obra “Por los hijos que sea”, dado a lume em 2002 na editorial Txalaparta.
As mostras de solidariedade com o músico já se fixérom sentir nas redes sociais ; no nosso país, Causa Galiza fijo pública a denúncia contra mais umha mostra de perseguiçom da liberdade de expressom, enquanto no País Basco, EH Bildu difundiu um chio em favor deste já consagrado músico popular.