Por José Manuel Lopes Gomes /
Juan Carlos I, rei emérito de Espanha, aterrará amanhá na capital da Galiza para receber pleitesia dos poderes autonómicos. O pretexto da visita é a entrega, por parte da Junta, do título de « Embaixador de Honor e Vitalício » do Caminho de Santiago. A organizaçom independentista Causa Galiza já chamou a mostrar rechaço popular ao acto, convocando através das suas redes sociais a se concentrar na Praça do Obradoiro às 11,30. Democracia para a Galiza e República galega serám as reivindicaçons centrais. Namentres o protesto tem lugar, o monarca estará no hostal dos Reis Católicos recebendo o seu título.
Segundo declaraçons dos organizadores do fasto o título entregado pretende “incrementar a projecçom internacional do Caminho de Santiago”. Na realidade, pretende promocionar politicamente conhecidos persoeiros da extrema direita espanhola e do regime ; de feito, antes de Juan Carlos, já o seu filho Felipe recebeu o galardom. Também o fijo Mariano Rajoy, umha das figuras políticas que insistem em realçar o caminho, tratando-o sempre à margem do que Compostela supom para a conformaçom histórica da Galiza, a sua língua e a sua dimensom europeia.
Resposta popular.
As mostras de rechaço da militáncia independentista às visitas reais tenhem umha longa tradiçom. Apesar de se celebrar no seu clássico formato de concentraçons com faixas e bandeiras, sem maior imprevisibilidade, som sempre respostadas com umha suspensom ilegal das liberdades fundamentais : requisa de simbologia galega, identificaçons massivas, proibiçom de passear por certas ruas a pessoas identificadas com nacionalistas, quando nom detençons e multas.
Amanhá veremos até que ponto o Reino de Espanha consuma esta prática de “democracia só para os afins” com a que trata toda oposiçom real. Também resta por ver qual é o recebimento que a esquerda e o nacionalismo institucionais dam a esta figura sinistra, emblema vivo do submetimento galego e dum regime escorado a soluçons ditatoriais.