Por José Manuel Lopes Gomes /

Na noitinha em que o Apalpador fijo a sua rolda principal por vilas e cidades galegas, a Guarda achega umha nota diferente. Fai-no graças ao Centro Social Fuscalho, que aproveitou a jornada do carvoeiro para organizar um completo festival. Chama-se ApalpadorFest e nom esquece a reivindicaçom: as vozes de denúncia de outros centros sociais estarám presentes, nomeadamente do CS Escárnio e Maldizer. Activistas retaliadas deste projecto exporám a fase pola que passa a sua luita trás o despexo do passado Maio.

O conjunto das actividades estám focadas como apoio para a assembleia de multadxs do Peleteiro, grupo de pessoas que afrontam processos sancionadores pola sua participaçom contra o despexo do CS Escárnio e Maldizer.Procurando que a festa popularize as ideias dissidentes, o ApalpadorFest inclui na sexta feira o concerto de Elephants Yard e Indomables, seguido polos picadiscos da Brigada Am Soundsystem no local Disco Tasca As Pozas.

No sábado 23, o público gozará dumha sessom vermu amenizada polos gaiteiros e gaiteiras do CS Fuscalho, seguida dum comedor vegano. A tarde estará centrada numha palestra de activistas do Escárnio e Maldizer, continuado por um obradoiro de rap e beatbox.

As duas completas jornadas terám a sua culminaçom com concertos de Great Beats, Xenderal e Menina Arroutada. Na madrugada, picadiscos de BirraRock fecharám a sessom.